ХОРООБУТ НЭҺИЛИЭГЭР ЭБИЭҺИ УОННА ВИКАНЫ ЫҺАЛЛАР

20.06.2019 

Афанасий Борисов бааһынай хаһаайыстыбата Хорообут нэһилиэгэр дуогабар түһэрсэн бааһынаҕа ыһыы үлэтин ыытар. Үлэһиттэр 150 гааҕа виканы кытта булкуйан эбиэһи ыһан эрэллэр. 

Хорообут нэһилиэгэр бааһынаҕа киирбиттэрэ аҕыйах хонно. Хаһаайыстыба салайааччыта тыа хаһаайыстыбатын управлениетын начаалынньыгар Иннокентий Семеновка уонна управление кылаабынай агрономугар Василий Бурнашевка күн-дьыл этэҥҥэ буоллаҕына, кэлэр нэдиэлэҕэ ити бааһынаҕа эбиэс ыһыытын түмүктүүр былааннаахтарын кэпсиир.

Бурдукка былааннара 506 туонна, эбиэскэ былааннара 150 туонна. Бааһына 150 гаатыгар виканы кытта булкуйан эбиэһи ыһан эрэллэрэ. Өссө 10 гаатын тыыран, онно Судан отун боруобаҕа ыһыахтаахтарын агроном этэр. Саҥа ирдэбилинэн, «Россельхозцентр» тэрилтэ улуустар агрономнарыгар «Агроном» суумкатын түҥэтэлээбитин Василий Бурнашев илдьэ сылдьар. Суумкаҕа бааһына уонна салгын температураларын, сиигин, тыал күүһүн быһаарар, онтон да тэриллэр, метровкатыгар, бүк тутуллар быһыччаҕа тиийэ, бааллар. Управление агронома бааһына температуратын 22 кыраадыс итии, сиигин олох аҕыйах, 1,1 бырыһыан диэн быһаарда. Кини быһаарарынан, Судан ото бааһына температурата 10, оттон эбиэс ‒ 4 кыраадыс итииттэн итэҕэһэ суох буоллаҕына ыһыллыахтаахтар.

Бааһынаҕа икки улахан тыраахтар диискэлии сылдьаллар: Тыа хаһаайыстыбатын министиэристибэтин 95 бырыһыаннаах субсидиятынан атыылаһыллыбыт сабыс-саҥа «БТЗ» уонна эргэ тыраахтардаттан таҥыллыбыт «ХТЗ». Саҥа тыраахтарга Владислав Сунхалыров, эргэҕэ Василий Оконешников буһа-хата үлэлии сылдьаллар. Эбиэһи ыһар сиэйэлкэлэргэ биригэдьиир Егор Саввин, Вячеслав Саввин уонна Хорообут уолаттара Спартак Винокуров, Капитон Баишев хара туман курдук буор ортотугар олороллор. Ыһыллыбыт бааһынаны  «Беларус» тыраахтар сүүрэ сылдьан үс хос катогунан дьиппинитэр. Ити үлэни Төҥүлү орто идэлиир техникумун бүтэрбит, икки сыл Афанасий Борисов тэрилтэтигэр быраактыкаланан, билигин үлэлии киирбит Ян Колесов уонна иккис сылын быраактыкаланар Павел Саввин толороллор. Өссө биир сиэйэлкэлиир тыраахтардара моһуохтаан, тыраахтарыыһа Виктор Афанасьевбыстах кэмҥэ сынньана барбыт асчыты солбуйар. Үлэһиттэр Майаларын сир аннынааҕы уутун 3 туонналаах цистернаҕа куттан бааһынаттан бааһынаҕа илдьэ сылдьаллар. Ол ууну иһэллэр, онон сууналлар. Утуйар, күн уотуттан хорҕойор улахан фургоннарын состорон көһөрөллөр. Бааһынаҕа уматыктаах цистерналаах тыраахтар мэлдьи баар.

‒ Быйыл Хорообут 143 гаалаах Кутурук Солооһуна бааһынатыгар паардааһыны ыытыахпытын баҕарабыт эрээри, гааҕа көрүллэр субсидия куонкуруһугар кыттыыбыт түмүгэ билигин биллэ илик, ‒ диир Афанасий Афанасьевич. ‒  Быйылгыттан саҕалаан, 500-чэ гааны паардыахпыт этэ.

Бааһына отуутугар эбиэстээх, викалаах, элбэх сыллаах оттоох кууллар тиэллэн кылбаһан тураллар. Афанасий Борисов хаһаайыстыбата быйыл хорообуттар 138 гаалаах, халытыллан нүөлсүтүллэр Түкэ ходуһаларын 80-тан тахса гаатыгар элбэх сыллаах оту саҥардан ыһыахтаах. Өссө 60 гааҕа бэйэтигэр уонна 15 гааҕа төхтүрдэр «Солооһун» хаһаайыстыбаларыгар анаан ыһар былааннаахтар. Хорообут нэһилиэгэр барыта 800-чэ гаа бааһына сирэ баарыттан сыл аайы 150-нуу, 200-түү гааны чөлүгэр түһэрэр туһунан соруктаналлар. Барыта бурдук, сүөһү аһылыга хайдах батарыллан иһэриттэн уонна суол-иис оҥоһулларыттан тутулуктаах. Атыылааһына кыайтарбата уонна тиэхиньикэлэр эргэрэн алдьана тураллара бурдугу үүннэриини хааччахтыыр. Атыылаһар саппаас чаастарын хаачыстыбалара эмиэ мөлтөх буолар эбит. Быйыл икки мотуору олорчу уларытан кэриэтэ оҥорбуттар. Эһиил дьыла үчүгэй буоллаҕына, ити бааһына улахан иэнигэр бурдугу ыһар баҕалаахтар. Былырыын хорообуттар 40, быйыл 50 туонна эбиэһи сылгыларыгар сакаастаабыттар. Онон Афанасий Борисов хаһаайыстыбата бурдугар мэктиэлээх сакааһы эрэйэр.

Ааптар: Аркадий ИННОКЕНТЬЕВ, Ulusmedia

 
 

Компания Инфомастер
Возврат к списку

Безопасные платежи: 
   
Корзина 0 позиций
на сумму 0 руб.