УРУЙДУУБУТ-АЙХАЛЛЫЫБЫТ КЫАЙЫЫ 74 СЫЛЫН ЧЭГИЭН КӨРСӨР УОТТААХ СЭРИИ БУОЙУННАРЫН!

08.05.2019 

     Тыа хаһаайыстыбатын министиэристибэтин (наркоматын) 97 сыллаах историятыгар кини киин аппараатыгар тыһыынчанан ахсааннаах  араас идэлээх испэсэлиистэр, салайааччылар үлэлээн-хамнаан ааспыттара, тыа сирин сайдыытыгар тугунан да кэмнэммэт сүҥкэн кылааттарын киллэрбиттэрэ.

Аҕа дойдуну көмүскүүр Улуу сэрии биэс сылын устатыгар Саха АССР сири оҥорууга наркоматын аппараатыттан Кыһыл Аармыйа кэккэтигэр барыта 64 үлэһит ыҥырыллан барбыта. Кинилэртэн 10 буойун Улуу Кыайыыны түстүүр  кыырыктаах кыргыһыыларга сырдык тыыннара быстыбыта. Ол кэлэр көлүөнэлэр эйэлээх олоххо дьоллоохтук олороллорун, айымньылаахтык үлэлииллэрин-хамныылларын, оҕону-ыччаты тэнитэллэрин туһугар бүтүн олохторун толук уурбуттар, сэрии хонуутугар дьоруойдуу охтубуттар үтүө ааттара өлбөөдүйбэт.        

Дьыл-күн аастаҕын, саас ыллаҕын аайы, ордук сэриигэ ылбыт баастарыттан дьарҕаран ыалдьан, арыый чэгиэн-чэбдик өттүлэрэ Дьылҕа Хааннарынан ыйыллыбыт кэмнэрэ да кэлэн буоллаҕа, биир-биир олохтон туораан иһэллэр. Билигин кинилэртэн саамай кииллэрэ, ыһыылара хааланнар Улуу Кыайыы 74 сылын өрөгөйдөөх күнүн көрсөн эрэллэриттэн биһиги бары долгуйабыт, үөрэбит, уруйдуубут-айхаллыыбыт!

Биһиги ортобутугар билигин даҕаны күө-дьаа көрсүһэ, кэпсэтэ-ипсэтэ, олох үөрүйэхтэригэр үөрэтэ-такайа, сүбэлии-амалыы сылдьар уоттаах сэрии тыыннаах туоһуларын – икки аарыма ааттаах дьоруой  буойуннар олохторун кылгас кэрчиктэрин аҕалабыт.

ГАВРИЛЬЕВ  ПРОКОПИЙ  ПЕТРОВИЧ 1925 сыллаахха Кэбээйи оройуонугар Сииттэ нэһилиэгэр төрөөбүтэ. 1949 сыллаахха, Дьокуускайдааҕы тыа хаһаайыстыбатын техникумун бүтэрэн баран, Нам оройуонугар Буденнай аатынан холкуос кылаабынай зоотехнигынан үлэлээбитэ. 1950 сыллаахха Сэбиэскэй Аармыйа кэккэтигэр ыҥырыллыбыта. Ол сулууспалыыр кэмигэр, 1950-1953 сылларга, Кореятааҕы сэриигэ Кытай народнай аармыйатыттан баҕа өттүнэн көмөлөһөөччүлэр кэккэлэригэр киирсэн кыттыыны ылбыта. Оччолорго ССРС Кореяҕа көмөтө дойду иһигэр кистэлэҥҥэ тутуллар буолан, кини сэриигэ кыттыспыта 1989 сылтан эрэ аһаҕастык кэпсэнэр, биллэр буолбута. Онно ССКП КК, ССРС Миниистирдэрин Сэбиэтин анал уурааҕынан Корея сэриитигэр сылдьыбыттар Аҕа дойдуну көмүскүүр Улуу сэрии кыттыылаахтарыгар тэҥнэммиттэрэ.

        Прокопий Петрович, 1958 сыллаахха Леннградтааҕы тыа хаһаайыстыбатын институтун бүтэрэн кэлэн баран, Үөһээ Халыма оройуонугар үлэҕэ ананан, тыа хаһаайыстыбатын инспекциятын начальнигынан, «Үөһээ Халыма» сопхуос дириэктэрин солбуйааччытынан, ССКП райкомун сэкирэтээринэн, онтон ССКП обкомун инструкторынан үлэлээбитэ. 1977 сылтан, биэнсийэҕэ тахсыар диэри, республикатааҕы т/х бородуукталарын соҕотуопкалааһыҥҥа уонна хаачыстыбаҕа государственнай инспекциятын специалиһынан үлэлээбитэ.

         Кини ССРС, Россия уонтан тахса мэтээллэринэн, Саха Республикатын «Гражданскай килбиэн» диэн үрдүкү бэлиэтинэн наҕараадаламмыта.

 

ЯКОВЛЕВ  НИКОЛАЙ  НИКИТИЧ 1926 сыллаахха Үөһээ Бүлүүгэ I Күүлэт нэһилиэгэр төрөөбүтэ. 1944 сыл от ыйыгар сэриигэ ыҥырыллан I Украинскай фроҥҥа 21-с аармыйа 120-с стрелковай дивизиятын 543-с гвардейскай полкатын пулеметчигын иккис нүөмэринэн сылдьан кыырыктаах кыргыһыыларга кыттыбыта. Кыайыы кэнниттэн түөрт аҥаар сыл устата Чехословакияҕа, Австрияҕа, Венгрияҕа, онтон Белоруссияҕа десантнай чаастарга сулууспалаабыта.

        Сэбиэскэй Аармыйаттан кэлээтин кытары ССКП Бүлүүтээҕи райкомун пропагандаҕа уонна агитацияҕа салаатын инструкторынан ылыллыбыта. Салгыы партийнай үлэҕэ сыстан Бүлүүгэ, Үөһээ Бүлүүгэ ССКП райкомнарын сэкирэтээринэн, онтон сэбиэскэй үлэҕэ көһөрүллэн Абый, Саккырыыр, Уус Маайа оройуоннарыгар райсовет исполкомун бэрэссэдээтэлинэн тахсыылаахтык үлэлээбитэ. Кэлин, бочуоттаах сынньалаҥар тахсыар диэри, ССКП обкомун, Саха АССР Миниистирдэрин Сэбиэтин инструкторынан үлэлээбитэ.

        Николай Никитич Аҕа дойдуну көмүскүүр Улуу сэрии II истиэпэннээх уонна икки Бочуот Знага уордьаннарынан, отуттан тахса мэтээллэринэн, Саха АССР Үрдүкү Сэбиэтин Бочуотунай грамотларынан наҕараадаламмыта. Кини Саха АССР норуотун хаһаайыстыбатын үтүөлээх үлэһитэ, Абый уонна Үөһээ Бүлүү оройуоннарын, Үөһээ Бүлүү оройуонун Далыр нэһилиэгин бочуоттаах гражданина, Россия персональнай пенсионера.

 


Компания Инфомастер
Возврат к списку

Безопасные платежи: 
   
Корзина 0 позиций
на сумму 0 руб.